المشاركات : 165العمر : 32أحترام قوانين المنتدي : تاريخ التسجيل : 31/01/2009
موضوع: نظرية "التومرجي" في بيع الأطفال! الثلاثاء مارس 17, 2009 12:03 pm
نظرية "التومرجي" في بيع الأطفال!
عيادة طبيب أطفال المكان ممتلئ بالأمهات والأطفال متباينو الأعمار، يبدو الجميع في انتظار الطبيب الذي تأخر على عيادته الخاصة حتى يكون في استقبال المحافظ الذي ذهب لزيارة المستشفى الحكومي في خطوة مفاجئة معروفة منذ ثلاثة أيام..
الست حسنية: يا اختي بيقولك الدكتور قدامه ساعتين على بال ماييجي
الست فكيهة: آدينا مستنيين.. هو أرخص واحد في الحتة وشغله كويس برضه.. ثم أنا ما أعرفش أروح لحد غيره من اللي بياخدوا في الكشف أجرة عملية ولادة! الست حسنية: على قولك.. الحالة صعبة اليومين دول.. ده حتى "أبو حسن" بيقول لي إنه قرأ في الجرايد إن فيه ستات باعوا ضناهم للأمريكان
تضرب الست فكيهة على صدرها جزعا ثم تقول: يا ساتر يا رب.. هي حصلت.. وبيبيعوا الواد بكام على كده؟!
الست حسنية: 20 ألف جنيه.. بس ده ولا كنوز الدنيا كلها تعوضني عن ابني.. يا ساتر يا ستار على الناس يتدخل التومرجي في الحديث: والله ربنا يستر علينا منكم أنتم.. أنتم غاويين فقر شكلكم.. فيها إيه يعني لما الواحدة فيكم تاخد لها كام ألف وكمان ابنها يسافر يعيش حياته في أمريكا.. عيشة نضيفة محترمة بدل العيشة الهم اللي إحنا بنخبط فيها دي!
تنقلب عليه كل الأمهات الحاضرات في المكان قبل أن تتحدث الست حسنية: أنت بتقول إيه يا جدع أنت؟ أبيع ابني إزاي.. ده أنا لا أبقى أم ولا أستحق أعيش في الدنيا دي
التومرجي بسخرية: ده على اعتبار إنك كده عايشة بقى! ثم إن اللي الجرايد كتبت عنهم دول أطفال "سفاح" ولا مؤاخذة.. يعني أطفال حرام الواد هيكبر من هنا يلاقي نفسه في ملجأ فيطلع سفّاح ولا قتّال قتلة.. ويلقطه زعيم عصابة يخليه يتاجر في المخدرات
الست فكيهة: وأنت ليه بتفترض الشر.. مش جايز ربنا يوفقه للخير.. ابن حرام ابن حلال في الأول وفي الآخر هو "ضنانا" ولا كنوز الدنيا كلها تساوي ضفره.. الست حسنية: وبعدين إيه ضمّنك إنه مايبقاش مجرم في أمريكا.. ولا عشان اللي هيتبنوه أمريكان يبقى لازم يطلع ابن ناس
التومرجي: يا حاجة.. كل واحد ابن بيئته.. على رأي اللمبي.. واحد مصاحب "علي علوكة" و"أشرف كخة" عاوزاه يطلع إيه؟ طيار! تجذب الست حسنية الست فكيهة في عنف: قومي يا ست من هنا.. الراجل ده فور دمي
التومرجي: اصبري يا حاجة الدكتور زمانه جاي الست حسنية: لأ متشكرين.. ابقى خليه يكشف على المحافظ! ***
على بال الدكتور ماييجي خلينا إحنا نناقش الموضوع برضه!
القضية بدأت من كام أسبوع..
عندما تم ضبط سيدة مصرية "تحمل الجنسية الأمريكية" وهي تحاول تسجيل طفلين حديثي الولادة باسمها في السفارة الأمريكية في القاهرة
مع بعض الضغوط والمواجهات اعترفت السيدة بأنها اشترت الطفلين من مسئولين في جمعية مخصصة لرعاية الأطفال المولودين سفاحا "الأطفال الذين تنجبهم سيدات تعرضن لعملية اغتصاب أو زنا"
الخيوط بدأت تجر خيوطا أخرى لتتضح التفاصيل في نهاية الأمر
أن هناك "شبه عصابة" تدير عملية بيع الأطفال المصريين المولودين سفاحا لأسر -مصرية برضه- تعيش في أمريكا في مقابل مبلغ مالي يتقاسمه الطبيب الذي قام بعملية التوليد والمسئولين في دار رعاية اجتماعية والأم أيضا
وكانت الخطة تقضي بأن الأسرة المقيمة في أمريكا ستتبنى الأطفال ليذهبوا ويعيشوا معهم في الولايات المتحدة وتنقطع صلتهم للأبد بأمهاتهم الأصليات بكل تأكيد
لاحظ أن ده بيتم بموافقة ورضا الأم بل أنها تأخذ نصيبها من الفلوس كمان لأن بيع الأطفال لابد أن يتم بعد الولادة بوقت قصير
صحيح أن ما تم كشفه لايزيد عن أربع أو خمس حالات لكن القضية اعتبرها كثيرون "شيئا مروعا" يكشف المزيد من الانهيار في المجتمع المصري.. الذي وصل إلى حد "بيع الأطفال الرضع"
وهناك فريق آخر ينظر للأمر -بعيدا عن المنطق الديني- بوجهة نظر عملية مفادها أنه من الأفضل فعلا لهؤلاء الأطفال أن يعيشوا في أمريكا لأن هذا يضمن لهم حياة محترمة ونظيفة ومستقبلا ربما يكون أفضل بكثير مما لو بقوا في مصر
أي أنهم يرون أن فرص هؤلاء الأطفال في أمريكا أفضل بكثير من فرصهم في مصر
يبقى ليه نحكم عليهم بأنهم "يموتوا بالحياة" هنا في مصر وهم في أمريكا ممكن يبدأوا حياة تانية.. ومين عالم جايز واحد منهم لو اتعلم كويس وكافح واجتهد يبقى وزير ولا مسئول كبير فيما لو فضل الواحد منهم هنا وغنى "ظلموه" يوم ما يحقق نجاحا ضخما سيكون زعيما لعصابة من أطفال الشوارع؟
وأنت ما رأيك؟
هل تؤيد وجهة نظر الأمهات في العيادة وشايف إن بيع الأطفال مهما كانت أسبابه لا يجوز تحت أي مسمى؟
أم تتبنى وجهة نظر التومرجي وتعتقد بأنه لو كان ده أمرا قد يبشر بمستقبل أفضل للأطفال.. فـ" وماله"؟